Million 370 harsatnak an tong

Northern India ah electric/meisa um lo ruangah mipi million 370 in harsatnak tawngin,  vansang tiril antawk, ti'n tuizingah cbsnews in apuang. Ahleice in million 200 umnak Utter Pradesh State ah meitha/electric power 9,000 megawatts lawng a cozah hnenin an ngah thei theu ti’n, Uttar Pradesh Power Corporation chief Avnish Awasthi in a rel. Zanah an it thei lo ih, zung feh an tlai theh, sunah 90 degrees F a si theu. Cun New Delhi khawpi sung cu an zaten an ngah theh zik thlang, ti a si.

Thudang, northern India State thotho Haryana ah Hindu pilgrims (Pathian be dingih fe) pawlcu trucks pahnih in a ttaih/collided ih mi 30 an thi. 

Mi 47 thi, 30 hliamna tuar

New Delhi ihsin Chenai khawpi feh Tlangleng/Train cu tuzing 4:00am hrawngah Nellore a thlengih a kang/burning, mi 47 thi, 30 hnakih tam hliamna tuar. Nellore cu Andhra Pradesh State ih khawpi south Hyderabad ihsin kilometers 500 (312 miles) hrawng asi. India ram hi Leitlun ah Train Networks nei tambik le Tlangleng 10,000 cuang nei an si, nitin a ram mipi million 20 hrawng cu Train hin an tlawng vak theu.

US$ 157million a sung/loss

Nuam ti zetih kan hman rero mi Facebook sumdawnnak a tla niam. Stock shares a lak hnu thla 4 sungah US$ 1180 million lakin $ 157 million an sung/loss. Cun Stock Shares khal 30% tiang a tla niam zo, ti asi.

Mi 88 thi 134 umnak nei lo

North Korea ah Typhoon Thlipi hrang le Ruahsur tamtuk ruangah Ti-lik/Tilian ciamco ih mi 88 an thi zo 134 hliam tuar, 63,000 umnak nei lo, ti’n Korean Central News Agency (KCNA) in mini Saturday ah a puang. Thlisia le Ruah hi July 18 ihsin a thok ih July 23 le 24 a bet. Loram 4,800 hectares a cimpil ruangah mipi 24 million ihsin a hrek hnakih tamin (2/3) ei le in harsa in an um zo. Cun mithi tamnak bik hmun cu Pyongyang Province a si. Publics In 5,000 le factories 60 hnakih tam a siat zo. 

Gold Medal Ngah hmaisabik

Nahzi 4 reizo: London 2012 Olympics ah China nu Yi Siling timi in Gold Medal a ngah hmaisabik. Siling hi kum 23 mi asi ih Nuu Meithalkah (women’s  10m Air Rifle) ah pakhatnak a ngah.

US Rammisinak dilduhtu hrang

US rammisinak (Citizenship) a dilduhtu hrangah cun Chin Center ah zir a theih, training an pe ding tiih kan Church Pastor in a sim dah mi ah feh thei le a thabik ding tiah ka ruat. Zirhtu nei ih zir cu thiam a awl deuh dinge. Cun, Can nei mal hrangah mai IN ah, mahten zir a theih thotho, na Computer, YouTube.com ah (or) Blu-ray player na nei ahcun na TV ah nau-um cingin,  Vainim le Bête suang phah in na zir thei, questions 100 a um.  Questions 10 an lo sut dingih paruk (6) na tidik ah cun na Ong. Kumtin a bangaw lo theu an ti, hmai kum hrang cu hmaikum ah kan update lehding aw.

A tangih ngan mi pawl hi YouTube ah ngan aw le:

Applying for US Citizenship Part 3 of 4

Citizenship - New Naturalization Test, (Part 1 of 3)

New U.S. Citizenship Test, 2011 (Part 3 of 3)

Applying for US Citizenship Part 4 of 4

(OR) link hi hmet mai aw, pls !

http://www.youtube.com/watch?v=gEqkFhRP1Ws&feature=related

http://www.youtube.com/watch?v=OWPqqcACayE&feature=related

http://www.youtube.com/watch?v=M1qnZH40q90

http://www.youtube.com/watch?v=MXf4eYUiszo&feature=relmfu

Olympics’ Thilmaksak

China ram Jingsu Province ihum Chen Guanming cu London Olympic Games zoh dingah kum 2 sung Thirleng-kethumnei (Saih-ka, Rackshow) to in a feh, ti’n News London in mini ah a puang. Chen hi kum 57 mi farmer (lo-hnatuan mi) a si. China ram ihsin May 23, 2010 ah a poksuak ih July 9 2012 ah London a thleng, cun ram 16 le khawpi 1764 a feh/pal tlang.

Mi 30 thi, 30,000 umnak nei lo

Assam State, India, Kokrajhar Distric ah Bodos miphun le Muslim pawl doawknak ruangah mi 30 thi, mi tampi’n hliam an tuar. Thing, lung, namtong , meithal le meisa/Fire thawn doawk ciamco a si. Khua 500 hrawng an siahsuah zo ih mi 30,000 umnak nei lo le ral tih in an tlan. Raltlan mi tampi cu Refugee Camp (Camps 37) ah an um, cun Kokrajhar Khawpi um  Zung le Tlawng pawl khal  khar theh asi tin Assam's chief minister Tarun Gogoi in a rel. Tuhlan kum reipi ihsin  Hindu, Christian le Muslin an rak buai ringring. Tui kum 30 sungah Assam ah hin Muslim mi 2,000 cuang an that zo.

1947 India Independence lak lai ah miphun/hmam 200 cuang an rak um zo ih cumiah Bodos pawl hi India North East lamah an ram um. 1991 census/mipumsiarnak ah mi 1.2 million an um. Assam State ah Hinduism 90.31% ,  Christianity 9.40% le others 0.29% an um.

Sual tuah ruangih riahsiatnak tong ding

Syria President Bashar al-Assad in Chemical Weapons a hmang a si ah cun thil Tuahsual ruangih riahsiatnak tumpi (tragic mistake) a tong ding, tiah US President Obama in tuni ah a sim. Leitlun ah minung athawngtelih thih theinak Chemical Weapons zohman in hman sian a si lo, ralring aw, tiah a ti.

Human Right pawlih reported pek dan vek a siah cun March 2011 ihsin tuni tiangah Syaria ram buainak ruangah mi 19,106 an thi zo, 1.5 million umnak nei lo, ti a si. 42,600 cu Turkey Refugee Camps ah an um. 34700 Jordan Refugee Camps ah an um. 110,000 UN tawlrelnak hnuai ah an um. 29,900 Refugee pawl cu Lebanon ah an um. 7,500 Refugee pawl cu Iraq ah an um.

A man tam/khung bik

Chelsea striker Drogba ti ih kan theih lar emem, Ivory Coast star Didier Drogba cu China ramih Super League Shanghai Shenhua Club ih HERO si dingah July 14 ah Pudong Airport a thleng zo. Shanghai um Football fans mi azatel in Airport ah an rak hmuak. Drogba cu $ 300,000 (£193,000) zarh khat (a week) ah hlawh dingin contact an tuah, tulai Leitlun Footballer ah cun a hlawh tam bik ding.

Mi 67 thi, 456 hliamna tuar

Kawlram Yangon khawlipi,  tui kum hrek (Jan-July 2012) sung hrawngah Motor Accidents ruangih mithi 67 le hliamna tuar 456 an um zo, ti'n tuanvoneitu U Hlah Aung in a sim. Motor accidents 143 sungah atambik cu driver fimkhur lo nak ruangah le an mawng cak tuk theu ruangah si a ti.

Accident motor tambik cu Line-ka kan tih theu, khawpi sungih miphur-motor (City Bus) Ma-tha-ta (မထသ (ဗဟိုု)) pawl an si. Line-ka/City bus pawl ahcun Ma-tha-ta (မထသ (ဗဟိုု)) hin motor a nei tam bik ih branch 17,  motor 8000 a nei, cun Thawngnga (5000) hrawng cu regular in Yangon khawlipi sungah nitin in hman an si.

Cun, Line-ka mawngtu pawl cu nih-sa le khoh-yee in a sawr theu. Feh/khoh tam le hlawh tam asiruangah driver pawlin feh/khoh tam duh in zamrang zetin an mawng theu, cucu accident a tam phah nak san bik si, tiah. Cun, accident an tong tik khalah driver in mawh a phur ding ruangah, driver cu a tlan cih.

President Theih Sein Khualtlawng

Kawlram President Thein Sein ni 3 cam dingin mani ah Thailand ah a tlawng. A vawi khat tlawnsuahnak a si ih tui kum January ah khan vawi 2 a tthul zo. Thai Prime Minister Yingluck Shinawatra thawn an tongaw dingih rampi Sumdawnnak thu an rel ding, cun Western Burma, Rohingya pawl thu khal an rel tel a zum um. 

Mi 10 thi, 14500 umnak cer

Mani Saturday, China ram Beijing khawpi sungah Thlipi hrang le Ruahsur tamtuk ruangah mi 10 hnakih tam thi, 14500 umnak nei lo in, an cer. Kum 60 sungah Ruahsur tambik ttum a si, Lamzin pawl ti in a cim pil theh ih Thingkung le Electric ban pawl an tlu, In tlun le lilawn pawl a siat. Vanzam flights 500 cuang an cancelled ruangah Airports ah mi tampi vansanganlam rero lai ti a si. 

Mi pakhat (1) thi, 24 kim hrih lo

Kawlram Kachin State,  Irrawaddy River,  Bhamo ihsin Katha feh Lawng/Boat cu Thursday zing 9:00am hrawngah alet ih mi 1 thi, 6 Hospital ah, runsuakmi (rescued) 73 le midang 24 pawl an hmu hrih lo, tu ah an hawl rero lai ti’n, voice of Russia in a puang. Tui mi 24 sungah  cun Myitkyina ih Inter University Tournament ih football lek ding 5 le an coach a tel, ti a si. Ruah a tam zet ih ti feh a cak fawn, thuamhnaw nei famkim lo thawn hawl hmuh awk theh ding cu a awl lo ding si, tiah.

Mi 12 thi, 58 hliamtuar

Colorado USA, Denver Khawpi Aurora ih a cangmi thil. Mizan zanlai, (Century Cinema midnight showing) Batman Movie suak thar an zoh lai ah Meithal keng mi pakhat in (12:30am ah) mipi a kap ciamco ih mi 12 thi, 58 hliam tuar. 12:45am ah Police an ra thleng ih a kaptupa tiih an zum mi James Holmes kum 24 mi cu an kai. A mah hi University of Colorado-Denver ah PhD a zirlai. Cun, President Obama le Mitt Romney khalin hi thihnak rapthlak zet ruangah an campaign an cancel hrih phawt si e.

Phawt's

$ 492 million a sung/can

Tulai, Leitlun hmun zakipah buainak, harsatnak le sunnak/cannak (loss) lawnglawng. Rampi sumdawnnak niam ruangah roreltu le mipi lakah a buai ih, community sungah le Kohhrah sung tiangin, mah le tuar nuam tawk ciau cu buainak kan nei theh a bang.

Cuvekin, Leitlun sumdawnnak ih tla-niam dah lo dingih ka rak ruah theu mi Microsoft Company khal in buainak tunpi a tawng. Tui thla thum (3 month) sungah $492 million an can/loss ih, kan dung kum tuvek ah cun $6.9 billion an miat/profit. Asancu, Microsoft  hin 2007 kum ah online ihsin ngahthei mi  Advertising  Company aQuantive cu $6.2 billion in a lei ih tuni tiangah a miat/profit mi a nei thei hrih lo ruangah si, tiah Indynews in mini Thursday ah a puang. Microsoft cu Public Company a si hnu, 1986 ihsin kum 26 sungah a can/loss vawi khat nak a si.